球星陳肇麒（陳七）本月中背住女友 Toby（劉雅婷）與23歲嫩模 Emily（張可義）到時鐘酒店爆房，結果陳七被南華解約、女友飛掉成雙失，自此潛水不見人。反而與他爆房的 Emily勇氣可嘉，昨日出席公開活動，口震震強調與陳七爆房沒事發生。
陳七與女友 Toby的好友 Emily去天后時鐘酒店爆房，事後 Toby嗌分手兼怒罵 Emily是卑鄙賤女人。陳七的事業亦因而跌至谷底，南華足球隊與他解約，他又稱要冷靜而放棄加入香港足球代表隊，此後再沒公開露面，反而女主角 Emily比他更勇，昨日身穿 bra top及短裙在尖沙嘴出席商業活動。
「房入面冇事發生」
據悉 Emily有望加盟 Model One公司，成為 Jessica C.師妹，似乎她因禍得福。昨日問她與陳七是否曾開房？她點頭說：「係同佢出街食飯，正常朋友交往，嗰日喺房入面冇事發生，我有同屋企人交代過件事，佢哋知我為人係點。」有記者取笑她在房內100分鐘是否在房裏下棋？她口震震說：「私人嘢唔回應。」
Emily撇清與陳七關係說：「我𠵱家係單身，我唔清楚陳七係咪回復單身，呢件事後冇同佢聯絡，對於佢成為雙失，我實在唔方便評論，但我以後會帶眼識人。」提到 Toby罵她是卑鄙賤女人？ Emily說：「冇睇報紙，唔知咁多嘢！」
Toby暫原諒陳七
Toby知道情敵 Emily公開露面，她昨日接受電話訪問時說：「人哋要搵食，爆房事件後，陳七有打過畀我，但 Emily唔敢搵我啦，我都唔想同佢做朋友，但對於陳七，我暫時原諒佢，但一唔一齊返要畀啲時間。」 Toby明顯擔心陳七爆房事件後變雙失，她心軟說：「我唔想見到佢咁。」 Emily強勢蒲頭勾起 Toby傷心事，據知她為此喊個不停
