泳兒首個個人音樂會前晚於會展舉行，她甫開場穿上一條白色吊帶裙於台上又唱又跳，驕人身段表露無遺，就連嘉賓張家輝也大讚她「唱歌好，身材更好！」令她十分尷尬，而經理人霍汶希則表示恐怕泳兒會「跌咗嘢出嚟」。
泳兒前晚於會展舉行首個個人音樂會，到場支持的藝人包括有劉家昌夫婦、關智斌、鍾舒漫以及洪卓立等人。音樂會上泳兒共換了五套服飾，甫開場便以一條白色吊帶裙示人，豐滿上圍隨着她一輪勁歌熱舞而高低跌宕，就連第一位上台的特別嘉賓張家輝都大讚泳兒身材好，他說：「我有留意你㗎，你唱歌又好，身材更好， OK㗎。」在旁的泳兒只好尷尬回應「 Just OK！」
及後張家輝於獨唱時表現得十分緊張，見他握緊拳頭不敢有太大動作，事後他指上台唱歌比拿影帝時更緊張，他笑言：「我覺得支咪突然好重，我唔想唱得唔好陀衰家呀，如果老闆叫我出碟我一定唔制㗎。」
另外泳兒請來吳雨霏、海鳴威以及譚詠麟擔任嘉賓，阿倫又大讚泳兒的歌聲能打動人心。演唱會中泳兒與男舞蹈員大跳辣身舞，男方的頭更貼於她胸前，台下歌迷見此即時尖叫。不過泳兒演繹火辣舞步時收起美好身段，以一件露背 T恤上陣，事後她解釋不想大家將焦點集中其身材上，而且她不是走性感路線。
泳兒的經理人霍汶希事後搞笑地向泳兒說：「我見你跳跳吓真係滴汗，幾驚你跌嘢出嚟，一路睇一路個心叫你唔好跌呀，我寧願自己跌出嚟，到時真係嚇壞啲細路。」
此外，有雜誌指泳兒最近成為老闆身邊大紅人，就連師姐容祖兒都及不上她，泳兒表示看到有關報道感到不快，她說：「呢件事係好 hurt，講到我人格唔係好好，我入行 4年同其他藝人都相處得好融洽。不過我唔會為呢件事搵祖兒去解釋，佢份人好大方，而且老闆個個都錫。」
