原帖由 iceson 於 24/7/2006 08:53 AM 發表
輝哥相馬眼太勁, 其他馬販都睇唔出隻馬:fff:
實在係一位好識嘢嘅前輩，點睇馬頭，點樣度掌位，每次聽佢講嘢都好有得著．但勁又點；太老實，太錫馬．聽過佢養一匹馬一季可以贏四五場未？跑得兩三場你想再出，佢就同你講：唔好噃，會跛噃... 死啦，咁鬼老實，就算幾愛馬都好，香港地幾百萬買隻畜牲番嚟，一季就起碼要靠四五場先回到本！
莫講話喺香港，喺外國做練馬師都未必一定撈得掂；除非係跟一啲靠出自家種跑嘅大牧場，本身又係一樣當馬好似親生仔咁嘅馬主老細．可惜一來，呢類主僕關係通常都係世家，講極深淵源；二來，到今日仲剩得幾多個呢類馬主呀？小說或者仲有嘅！
講到外國，大家呢幾日好關心嘅賓康就係另一個好例子．夠料，夠叻啦，莫講話馬，人都可以年年培養一兩件出來．今年又有個 Julien Leparoux：廿一歲法國牌仔，初到肯塔基已經做晒三大馬場三個春季賽期嘅冠軍騎師，全美空前，呢一刻蘇銘倫都唔夠佢騎．可惜又如何，嚟到咁多年，咪一樣同古摩守副倉．好馬只有柏列查份，大場面同主馬分倉出，佢嗰隻就只有份同人放兔．人地背景地頭厚過你，後生過你，玩手腕自然好過你．佢只有份到處同老闆走拍賣會，揀好牌俾人上，今次聽講都係頻撲過勞先出事... 真係世態炎涼．
