【 09書展星戰場 22/7-28/7】 o靚模入侵書展引起網民杯葛，以 4萬人之力迫使鍾蕙芝（ Lavina）和胡心諾（ Rainbow）等人放棄在書展舉行簽名會，道德網民跟 o靚模兩幫人馬似乎勢成水火，就在兵慌馬亂之際，計劃於書展開幕當日靜坐的反 o靚模召集人 Isaac（張振海），昨日在中環跟 Lavina進行歷史性「破冰」會談。未見 34E的 Lavina時， Isaac只知對方性感，但經過 60分鐘促膝長談後， Isaac自言對 Lavina徹底改觀，大讚她思想理性，矛頭又轉向另一 o靚模周秀娜，直斥獻吻會跟書展無關。
身為反 o靚模網民之首的張振海，昨日與 Lavina相約在中環一餐廳內進行對談，因先前曾屢次隔空過招，有過種種誤會，起初兩人均表現拘謹，雖然相鄰而坐，但彼此間隔着十丈遠距離。 18歲的 Isaac面對 34E的 Lavina更表現得頗不自然，還是 22歲較成熟的 Lavina先打破隔膜，主動坐近 Isaac身旁，並在自備的《夏之盛放》寫真集上簽名送給 Isaac，其後 Lavina推銷自己的寫真集時， Isaac也投以欣賞目光。以下是兩人的詳談內容。
「着比堅尼影相冇問題」
L：我哋本寫真集係經過審核，係適合嘅……即係唔使包膠袋，唔係淫褻。（ Lavina逐頁逐頁翻開《夏之盛放》寫真集）我哋本寫真集係一個愛情故事，相片係陪襯，本書都好健康。
I：你揭嗰陣我有睇過，冇問題㗎，我覺得 OK，健唔健康每個人定義唔同，我自己覺得冇問題，好多男人自己平時睇嘅更加過份。（摸頭笑）
L：我哋好多相係着番衫，唔係故意賣弄性感。
I：（猛點頭）係呀，係呀，着比堅尼影相冇問題㗎，去沙灘都大把比堅尼啦。
（ Isaac被 Lavina一輪嘴的硬銷攻勢打動，態度開始沒有之前強硬。）
I：我係針對太過火嘅宣傳，令書展道路好擠逼， fans叫囂，影響書迷，我建議將書展同寫真宣傳分開，咁你哋都有充足空間，咁你樂唔樂意有新嘅展覽？
L：（認真的思索一會）香港係有言論自由，大家可以表達自己嘅意見，我贊成大家講出自己嘅心聲，但要尊重別人，有時會言論過激。我有睇番你嘅回應，我知你嘅初衷唔係咁，亦都唔係主要針對 o靚模。
I：其實我係對事不對人。
L：你覺得其他藝人出書又點？
I：如果造成騷動，影響書迷，當局都要管理。過往有經驗，太多人衝住明星而嚟，為影相、握手同簽名，秩序有問題，未必寫真集造成混亂。
（雙方圍繞書展問題理性討論了一輪，關係和睦。）
獲贈寫真集稱會珍藏
記： 呢次接觸過 Lavina後，會唔會對佢印象改觀？
I： 性格好好㗎，我覺得佢（ Lavina）講嘢好 make sense，幾好。
L：評價呢？
I：係 OK嘅。
（ Lavina再三提醒 Isaac要好好珍藏她的寫真集， Isaac表示會尊重女友意見才一同欣賞。）
其後 Isaac主動提到 o靚模周秀娜在書展舉行獻吻會有問題，他說：「好有可能造成滋擾，首先會排長龍同喧鬧，獻吻會呢樣嘢一路以嚟都冇，同書展冇關係，簽名會都仲話簽喺本書度，一年一度嘅書展應該維持佢嘅獨特性，邊個係周秀娜，我都記唔出。」
小八卦： Isaac遭網民起底
18歲英國留學生張振海（ Isaac）日前在 Facebook發起反 o靚模大聯盟，瞬間成為風頭人物。雖然事後 Isaac入後波改口稱沒有反 o靚模，只是針對貿發局云云，但其底細已被網民起乾起淨。他的 Facebook有 600多名好友，而找來的照片中， Isaac穿上「 Sex Professor（性教授）」字樣潮 T，又試過舉反 V手勢拍照，可見他平日愛好抱不平。
採訪手記：挺胸合照動 L上身
Lavina昨日因工作姍姍來遲，累 Isaac呆等 1個鐘，不過她十分識做，甫見面即主動與 Isaac握手，不過 Isaac懶洋洋坐在座位上，握手時未有站起來，幸好對談的過程中二人有傾有講。臨離開前 Lavina再次主動跟 Isaac握手道別，並送上親筆簽名的寫真集《夏之盛放》給他作紀念禮物，這次 Isaac雖然有站起身，但站姿如「攣弓蝦米」， Lavina即喝一句：「你企直啲啦，影相靚啲。」 Isaac馬上「動 L」上身，挺直腰背與挺胸的 Lavina合照，相映成趣。
